專題文章

最緊要正字

參考編號: SP20160623

  • 日期2016年6月23日
  • 類別 親子王《親子談性樂》專欄
  • 對象不適用
  • 作者教育組 陳耀杰
  • 主題 家庭性教育

晴晴:「媽咪,點解我對『嘢嘢』生得咁大,個『窿窿』又咁細嘅?」
媽媽:「你對『嘢嘢』似爹哋,『窿窿』似媽咪,你唔開心咩?」
晴晴:「係!啲人成日攪我對『嘢嘢』。輝輝仲衰,叫我大嘢晴!佢個『插插』夠扁啦!」
媽媽:「晴晴唔鍾意俾人改花名,都唔應該亂話人地喎。」
晴晴:「鬼叫佢激到我『波波』都突晒出嚟呀!」
媽媽:「晴晴,我哋嘅『嘢嘢』用嚟聽嘢,『窿窿』用嚟食嘢,『插插』用嚟聞嘢,
『波波』用嚟睇嘢,只要功能正常,就唔駛太介意大細,更加唔好攞嚟講笑。」

用「波波」、「嘢嘢」、「窿窿」、「插插」代替眼耳口鼻,含糊不清易生誤會,為可不直接了當說出器官的正確名稱?可是,說到男女的性器官時,部份家長為了避免尷尬,仍然傾向使用代名詞,以含糊的「下面」、「嗰度」、「小便嗰度」與子女溝通。至於男孩子的性器官代號更是五花八門,包括:「啫啫」、「雞雞」、「菇菇」、「周周」、「何B仔」等。假如子女慣於接收甚至使用性器官代號,可能造成以下問題:

1. 養成不健康的性態度
爸爸:「做乜見你又摸『嗰度』?」
兒子:「咩嘢『嗰度』呀?」
爸爸:「我係想問,你『雞雞』係咪痕呀?唔好成日用手摸啦。」
兒子:「我有『雞雞』!爸爸有『雞雞』!我地一齊食炸雞!哈哈哈哈!」

家長對於性器官含糊其詞,只會使子女誤以為性是禁忌或污穢。此外,很多性器官的疊字代號都容易上口,有機會淪為小孩間取樂的口頭禪,易學難改。

2. 接收到錯誤的性知識
媽媽:「女仔『小便嗰度』唔可以隨便俾人睇同摸,知唔知?」
女兒:「知道,咁『小便嗰度』係咪即係生BB嗰度?」
媽媽:「都係呀,差唔多啦。」
女兒:「嗚嗚嗚嗚……我大個唔生BB喇!『小便嗰度』咁細點生啫!」

女性小便的尿道和生小孩的陰道,完全是兩條不同的管道,請不要混為一談。傳遞錯誤性知識是完全不可取的事,子女知道真相後會減低對父母的信任。

3. 被誤會為擾亂秩序者
老師:「有無同學可以講出男孩子性器官的正確名稱?」
俊俊:「老師我知,係『啫啫』。」
全班:「『啫啫』?哈哈哈哈哈哈哈……」
老師:「家俊!你係咪好鍾意鬧事呀!」

當沒有正規性教育訓練的老師,遇上以為代號便是正確名稱的小孩,加上全班同學突然爆笑失控,慌張的老師可能一時產生誤會,導致無辜的孩子受罰。

4. 語出驚人或嚇壞別人
女同學:「亞SIR我想問嘢呀。」
筆者:「歡迎!問啦。」
女同學:「女人生仔係咪要剪『西』(門字部正音粗口)呢?」
筆者:「你指會陰?係呀,剪開小小會讓BB較容易出來。」

這個是筆者的親身經歷,推斷是該名初中女生經常在家和朋輩間接收所致。換轉是一般人聽到女生的說話,很可能留下壞印象,甚至被她嚇怕。

男孩的「陰莖、陰囊」和女孩子的「陰部、陰道」是正常不過的性器官學名,家長應以身作則,平日與子女交談採用正字正詞,這樣才可培養子女健康的性態度,傳授正確的性知識。如果父母連性器官的正確名稱都說不出來,這樣的性教育又怎能教子女信服呢?